Նիդերլանդների Զարգացման Ֆինանսական Ընկերությունը (FMO) և ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ-ը կնքել են 15 մլն ԱՄՆ դոլարի չափով վարկային համաձայնագիր Նիդերլանդների Նորդվեյք քաղաքում՝ FMO-ի կողմից կազմակերպված «Ֆինանսների Ապագան» կոնֆերանսի ընթացքում: Նշված համաձայնագրի շրջանակներում ֆինանսավորումն ուղված է լինելու Հայաստանում գործող միկրո, փոքր և միջին ձեռնարկությունների, ինչպես նաեւ գյուղատնտեսության հատվածի զարգացմանը:
Նշված վարկային ռեսուրսը բազմարժութային է, որը ենթադրում է որ ներգրավվող ռեսուրսը կամ նրա մի մասը կարող է լինել ինչպես ԱՄՆ դոլարով, այնպես էլ ՀՀ դրամով: Սա Բանկի և FMO-ի միջև առաջին ուղիղ համագործակցության համաձայնագիրն է: Նշենք, որ Բանկը FMO-ի հետ իր համագործակցությունը սկսել է դեռևս 2012թ.-ից՝ Բանկի և ՎԶԵԲ –ի միջև կնքված տեղական արժույթով սինդիկացված վարկի շրջանակներում, որի ժամանակ FMO-ն հանդես է եկել որպես Բ վարկատու:

FMO-ի մասին

FMO-ն հոլանդական զարգացման բանկ է: Այն 46 տարի շարունակ ներդրումներ է կատարել զարգացող երկրների տնտեսությունների մասնավոր հատվածում և զարգացող շուկաներում: FMO-ն ներդրումներ է կատարում այն ոլորտներում, որտեղ իրականացված աջակցությունը կունենա ամենաարդյունավետ երկարաժամկետ ազդեցությունը. ֆինանսական կազմակերպություններ, էներգետիկա և գյուղատնտեսություն: Միաժամանակ FMO-ի համագործակցությունը տարածվում է նաև շինարարության, արտադրության և ծառայությունների ոլորտներում:

Շուրջ 85 երկրներում 8.9 մլրդ եվրոյի ներդրումներ իրականացրած FMO բանկը (www.fmo.nl) հանդիսանում է մասնավոր հատվածի զարգացմանը խթանող խոշորագույն կազմակերպություններից մեկը: