Ակբա բանկը միացել է Ածխաթթու գազի արտանետման հաշվառման ֆինանսական համագործակցությանը (PCAF):

PCAF-ը ֆինանսական հաստատությունների միջև համաշխարհային համագործակցություն է, որի նպատակն է ներդնել միանման մոտեցումներ՝ գնահատելու բանկերի կողմից տրամադրվող վարկերի և ներդրումների արդյունքում առաջացող ջերմոցային գազերի արտանետումները։ Համագործակցությանն արդեն իսկ անդամակցում է ավելի քան 600 ֆինանսական հաստատություն ամբողջ աշխարհից։

Ակբա բանկի և PCAF-ի համագործակցությունը համապատասխանում է բանկի 2025-2028թթ. ESG (բնապահպանական, սոցիալական և կառավարում) ռազմավարությանը, որի նպատակն է նպաստել Հայաստանում «Կայուն» զարգացմանը միտված բազմաթիվ ծրագրերի իրականացմանն ու «կանաչ» տնտեսությունների աջակցմանը։ Այս անդամակցությամբ Ակբան կնպաստի Հայաստանում ածխածնային արտա­նե­տումների նվազեցմանը։

Այս համագործակցությամբ Ակբա բանկը.

• հիմքեր է նախապատրաստում մինչև 2035 թվականը հասնելու կլիմայական չեզոքության` հավասարակշռելով ներքին գործառույթների շրջանակում արտանետված և մթնոլորտից հեռացված ջերմոցային գազերը,
• պարտավորվում է PCAF-ի չափանիշներից որևէ մեկի համաձայն չափել և բացահայտել ջերմոցային գազերի արտանետումները,
• համապատասխանեցնելու է վարկային պորտֆելը PCAF ստանդարտներին՝ ածխածնի հաշվառման համար

Ակբա բանկի մասին

Ակբան Հայաստանի բանկային համակարգում «կանաչ» տնտեսությունների, էներգաարդյունավետ նախագծերի ֆինանսավորման առաջատարներից մեկն է։ Ակբա բանկը Հայաստանի առաջին լիզինգային կազմակերպության՝ Ակբա Լիզինգի հիմնադիրն է ու 100% բաժնետերը (վերջինիս լիզինգային պորտֆելում «կանաչ» ֆինանսավորման հատվածը կազմում է ավելի քան 40%),Եվրոպայի առաջատար ակտիվների կառավարիչ ֆրանսիական Ամունդիի հետ համատեղ Հայաստանում հիմնադրել է «Ամունդի-Ակբա Ասեթ Մենեջմենթ» ընկերությունը: Ակբա բանկը ներկայացված է Հայաստանի բոլոր մարզերում, ունի 65 մասնաճյուղ։

Ածխաթթու գազի արտանետման հաշվառման ֆինանսական համագործակցության (PCAF) մասին

PCAF-ը միջազգային մակարդակով գործարկվել է 2019-ին։ Այսօր ավելի քան 600 ֆինանսական հաստատություն միացել է այս նախաձեռնությանը։ PCAF-ի բոլոր մասնակիցները համագործակցում են ջերմոցային գազերի արտանետումները չափելու և բացահայտելու ստանդարտները մշակելու ուղղությամբ։ Ստանդարտների նպատակն է չափել և հրապարակել ֆինանսական հաստատությունների վարկերի և ներդրումների արդյունքում առաջացող ջերմոցային գազերի արտանետումները։