Տեղեկացնում ենք, որ տեղի է ունեցել «ԱԿԲԱ ԲԱՆԿ» բաց բաժնետիրական ընկերության (այսուհետ նաև՝ Բանկ) բաժնետերերի արտահերթ ընդհանուր ժողովը (այսուհետ նաև՝ Ընդհանուր ժողով) առանց բաժնետերերի ֆիզիկական ներկայության՝ քվեաթերթիկներով (ներառյալ՝ էլեկտրոնային եղանակով) քվեարկելու միջոցով։

Ժողովին գրանցվելը և քվեարկությունը հասանելի են եղել 2024 թվականի նոյեմբերի 12-ի ժամը 09։00-ից սկսած մինչև նոյեմբերի 21-ի ժամը 18։00-ն։

Համաձայն Բանկի խորհրդի 17/10/2024թ.-ի նիստի թիվ 157-Բ4 որոշման՝ Ընդհանուր ժողովին մասնակցելու իրավունք են ունեցել բոլոր այն բաժնետերերը, անկախ տնօրինվող բաժնետոմսերի քանակից, ովքեր 2024 թվականի հոկտեմբերի 17-ի, Երևանի ժամանակով ժամը 17։00-ի դրությամբ ընդգրկված են եղել Բանկի բաժնետերերի ռեեստրում և ունեցել են բաժնետոմսերի անձնական հաշիվներ։ Այդպիսի բաժնետերերի քանակը կազմել է 5,513 անձ։

Համաձայն Բանկի Հաշվիչ հանձնաժողովի 22/11/2024թ.-ի թիվ 5 արձանագրության՝ ամփոփ տվյալներով 2024 թվականի նոյեմբերի 12-ից 21-ը անցկացված բաժնետերերի արտահերթ ընդհանուր ժողովին մասնակցելու համար գրանցվել և քվեարկությանը մասնակցել են ընդհանուր 4,499,779 (չորս միլիոն չորս հարյուր իննսունինը հազար յոթ հարյուր յոթանասունինը) հատ քվեարկող բաժնետոմսերի սեփականատերերը, որը կազմում է ընդհանուր քվեարկող բաժնետոմսերի 81.81%-ը (ութսունմեկ ամբողջ ութսունմեկ հարյուրերորդական տոկոսը)։

Ըստ այդմ, Բանկի բաժնետերերի 2024 թվականի նոյեմբերի 12-ից 21-ը անցկացված բաժնետերերի արտահերթ ընդհանուր ժողովն իրավասու էր (Քվորումն առկա էր):

Ժողովի կողմից կայացվել են հետևյալ որոշումները.

1. Հաստատել լրացուցիչ բաժնետոմսերի տեղաբաշխման արդյունքներ.

Բացատրություն

Համաձայն իր կայքէջում հրապարակված թողարկվող բաժնետոմսերի վերաբերյալ ազդագրի (գրանցված է ՀՀ կենտրոնական բանկում 25/09/2024թ.)՝ Բանկը 2024թ. նոյեմբերի 1-ից մինչև 8-ն իրականացրել է լրացուցիչ բաժնետոմսերի տեղաբաշխում՝ նախքան տեղաբաշխումն իրականացնելը հնարավորություն ընձեռելով Բանկի բաժնետերերին իրականացնելու նոր թողարկված բաժնետոմսերի նկատմամբ իրենց նախապատվության իրավունքը։ Պրոպարկո ընկերությունը բաժանորդագրվել է բոլոր այն բաժնետոմսերի ձեռք բերմանը, որոնք Բանկի բաժնետերերը ձեռք չեն բերել իրենց նախապատվության իրավունքի շրջանակներում։ Ժողովին մասնակցելու իրավունք ունեցող բաժնետերերը: Տեղաբաշխումն ավարտելուց հետո Ժողովի հաստատմանն են ներկայացվել տեղաբաշխման արդյունքները:

Որոշում

Ընդհանուր ժողովը հաստատեց Բանկի կողմից 2024թ. նոյեմբերին իրականացրած լրացուցիչ բաժնետոմսերի տեղաբաշխման արդյունքները հետևյալ կերպ.

• Լրացուցիչ տեղաբաշխված բաժնետոմսերի ընդհանուր քանակ՝ 485,000 հատ հասարակ (սովորական) բաժնետոմսեր:
• Լրացուցիչ տեղաբաշխման արդյունքում կանոնադրական կապիտալի ավելացում` 4,850,000,000 ՀՀ դրամ:

2. Կանոնադրական կապիտալի ավելացմամբ (բաժնետոմսերի տեղաբաշխման արդյունքներով և չբաշխված շահույթի հաշվին) պայմանավորված հաստատել կանոնադրությունը նոր խմբագրությամբ

Բացատրություն

Կանոնադրական կապիտալի ավելացումը կատարվել է լրացուցիչ բաժնետոմսերի տեղաբաշխման և նախորդ տարիների չբաշխված շահույթի հաշվին բաժնետոմսերի անվանական արժեքի ավելացման միջոցով։ Lրացուցիչ բաժնետոմսերի տեղաբաշխման արդյունքում Բանկի կանոնադրական կապիտալն ավելացել է 4,850,000,000 ՀՀ դրամով, իսկ բաժնետոմսերի անվանական արժեքի ավելացման արդյունքում՝ 29,925,000,000 ՀՀ դրամով։ Արդյունքում՝ Բանկի կանոնադրական կապիտալն ավելացել է 34,775,000,000 ՀՀ դրամով և կկազմի 89,775,000,000։ Լրացուցիչ բաժնետոմսերի թողարկման շարժառիթը նոր բաժնետիրոջ ներգրավումն է։

Նոր բաժնետիրոջ ներգրավումը Բանկին կտա հետևյալ առավելությունները.

- Բանկի բաժնետիրական կառուցվածքում հեղինակավոր ֆինանսական հաստատության առկայություն

- Բանկի բիզնեսի ընդլայնում և շուկայի մասնաբաժնի ավելացում

- Բանկի կորպորատիվ կառավարման զարգացում

- Միջազգային ֆինանսական շուկաների հետ համագործակցության ընդլայնում:

Բաժնետոմսերի անվանական արժեքի բարձրացման միջոցով կանոնադրական կապիտալի ավելացման շարժառիթն է կապիտալի համարժեքության նորմատիվի բարելավումը և չբաշխված շահույթի նվազեցումը։

Կանոնադրական կապիտալի ավելացման արդյունքում Բանկի բաժնետոմսերի ընդհանուր քանակը կազմում է 5,985,000 հատ սովորական բաժնետոմս, իսկ բոլոր բաժնետոմսերի անվանական արժեքի ընդհանուր գումարը՝ 89,775,000,000 ՀՀ դրամ։

Տեղաբաշխման արդյունքում Բանկի կողմից հայտարարված բաժնետոմսերի քանակը 3,000,000 հատ սովորական բաժնետոմսերից նվազել է և կազմել 2,515,000 հատ սովորական բաժնետոմս։ Ստացված քանակը կլորացնելու նպատակով՝ առաջարկվել է կանոնադրությամբ սահմանել, որ Բանկի կողմից հայտարարված բաժնետոմսերի քանակը կազմում է 2,500,000 հատ սովորական բաժնետոմս։

Որոշում

• Հաստատել Բանկի կանոնադրությունը նոր խմբագրությամբ՝ պայմանավորված կանոնադրական կապիտալի ավելացմամբ (բաժնետոմսերի տեղաբաշխման արդյունքներով և չբաշխված շահույթի հաշվին) և ներկայացնել ՀՀ կենտրոնական բանկ գրանցման։
• Համաձայն կանոնադրության նոր խմբագրության՝ Բանկի կանոնադրական կապիտալը 55,000,000,000 ՀՀ դրամի փոխարեն կկազմի 89,775,000,000 ՀՀ դրամ, մեկ բաժնետոմսի անվանական արժեքը 10,000 ՀՀ դրամի փոխարեն կկազմի 15,000 ՀՀ դրամ, իսկ հայտարարված բաժնետոմսերի քանակը 3,000,000 հատի սովորական բաժնետոմսի փոխարեն կկազմի 2,500,000 հատ սովորական բաժնետոմս:

3. Հաստատել «Տնտեսական համագործակցության խթանման և մասնակցության ընկերության» (Պրոպարկո ընկերության), Բանկի և «ԱԿԲԱ ՖԵԴԵՐԱՑԻԱ» ՓԲԸ-ի միջև կնքվող բաժնետիրական համաձայնագրի արդյունքում կանոնադրությունը նոր խմբագրությամբ:

Բացատրություն

Ինչպես ներկայացվել է Բանկի կողմից իր կայքէջում հրապարակված թողարկվող բաժնետոմսերի վերաբերյալ ազդագրում (գրանցված է ՀՀ կենտրոնական բանկում 25/09/2024թ.)՝ Պրոպարկո ընկերության հետ ստորագրվել են կամ կստորագրվեն պայմանագրեր, ինչպիսիք են ներդրումային պայմանագիրը և բաժնետիրական համաձայնագիրը, որոնք կկարգավորեն Պրոպարկո ընկերության կողմից կատարվող ներդրման և Բանկի կառավարման հետ կապված հարցեր։ Բաժնետիրական համաձայնագիրը, որը ստորագրվելու է Բանկի, Պրոպարկո ընկերության և «ԱԿԲԱ ՖԵԴԵՐԱՑԻԱ» ՓԲԸ-ի միջև նախատեսում է որոշակի փոփոխություններ կատարել Բանկի կանոնադրության մեջ։

Փոփոխությունները հիմնականում առնչվում են Բանկի խորհրդի և բաժնետերերի ընդհանուր ժողովի միջև իրավասությունների վերաբաշխմանը և խորհրդին վերապահված մի շարք հարցերով որոշում կայացնելու համար անհրաժեշտ ձայների փոփոխությանը։ Մանրամասները ներկայացված են Կանոնադրության նոր խմբագրության նախագծում։

Որոշում

Հաստատել Բանկի կանոնադրությունը նոր խմբագրությամբ՝ պայմանավորված «Տնտեսական համագործակցության խթանման և մասնակցության ընկերության» (Պրոպարկո ընկերության), Բանկի և «ԱԿԲԱ ՖԵԴԵՐԱՑԻԱ» ՓԲԸ-ի միջև կնքվող բաժնետիրական համաձայնագրի պահանջներով և ներկայացնել ՀՀ կենտրոնական բանկ գրանցման։