Տեղեկացնում ենք, որ սույն թվականի դեկտեմբերի 7-ին գումարվել է «ԱԿԲԱ ԲԱՆԿ» ԲԲԸ բաժնետերերի արտահերթ ընդհանուր ժողովը: Արտահերթ ընդհանուր ժողովը գումարվել է Հայաստանի Կենտրոնական Դեպոզիտարիայի CDA online հավելվածով էլեկտրոնային քվեարկության միջոցով։

Ժողովի կողմից կայացվել են հետևյալ որոշումները.

1. Բանկում ստեղծել հաշվիչ հանձնաժողով։

Բանկում հաշվիչ հանձնաժողով ստեղծելու պահանջը պայմանավորված է օրենսդրական կարգավորումներով։

Մասնավորապես, «Բաժնետիրական ընկերությունների մասին» ՀՀ օրենքի 75-րդ հոդվածի համաձայն՝ 50-ից ավելի բաժնետեր (քվեարկող բաժնետոմսերի սեփականատեր) ունեցող Ընկերությունում ստեղծվում է հաշվիչ հանձնաժողով, որի քանակական կազմը և անդամները, ինչպես նաև լիազորությունների ժամկետը սահմանվում են ժողովի որոշմամբ` խորհրդի ներկայացմամբ:

Ներկայացվեց, որ առաջարկվում է Բանկում ստեղծել հաշվիչ հանձնաժողով՝ բաղկացած 3 անդամից և հանձնաժողովի կազմում նշանակել հետևյալ անձանց.

• Նարեկ Արայիկի Անտոնյան - Բանկի Կորպորատիվ իրավական բաժնի պետ, Բանկի Կորպորատիվ քարտուղար
• Տաթևիկ Իգիթյան - Բանկի Կորպորատիվ իրավական բաժնի իրավաբան
• Սիրանուշ Հարությունյան - Բանկի Ակտիվների և պասիվների կառավարման բաժնի Դիլինգի բեք օֆիսի թիմ լիդեր

2. Հաստատել Բանկի կողմից լրացուցիչ բաժնետոմսերի տեղաբաշխման արդյունքները։

Բանկը ս.թ. սեպտեմբեր-նոյեմբեր ամիսներին հաջողությամբ իրականացրեց լրացուցիչ թողարկված 500,000 հատ բաժնետոմսերի առաջնային հրապարակային տեղաբաշխումը։ Տեղաբաշխման արդյունքում Բանկի կանոնադրական կապիտալը կավելանա 5 միլիարդ ՀՀ դրամով։

3. Հաստատել Բանկի կանոնադրության մեջ առաջարկվող փոփոխությունները, հաստատել կանոնադրության նոր խմբագրությունը և ներկայացնել ՀՀ կենտրոնական բանկ գրանցման։

Համաձայն կանոնադրության նոր խմբագրության՝ Բանկի կանոնադրական կապիտալը 50 (հիսուն) միլիարդ ՀՀ դրամի փոխարեն կկազմի 55 (հիսունհինգ) միլիարդ ՀՀ դրամ):

4. Կատարել փոփոխություն Բանկի խորհրդի կազմում:

Բանկի նշանակալից մասնակից «ԱԿԲԱ ՖԵԴԵՐԱՑԻԱ» ՓԲԸ Խորհրդի կողմից 19/11/2021թ.-ին որոշում է կայացվել վաղաժամկետ դադարեցնել Մարատ Մելիքսեթի Հարությունյանի լիազորությունները Բանկի խորհրդի կազմում և վերջինիս փոխարեն առանց ընտրության Բանկի խորհրդի անդամ նշանակել Ռաֆայել Երվանդի Սարգսյանին։

Նշված փոփոխությունը պայմանավորված է Բանկի կողմից իր կորպորատիվ կառավարման համակարգն ուժեղացնելու, և հատկապես, պրոֆեսիոնալ Խորհուրդ ձևավորելու հանձնառությամբ։

Համաձայն «Բանկերի և բանկային գործունեության մասին» ՀՀ օրենքի 21³ հոդվածի 2-րդ կետի և «Բաժնետիրական ընկերությունների մասին» ՀՀ օրենքի 85-րդ հոդվածի 2-րդ մասի՝ Խորհրդի կազմում նշված փոփոխությունն իրականացվում է առանց Բանկի ընդհանուր ժողովի կողմից ընտրության։

Քվեարկության արդյունքներն ամփոփվել են 08 դեկտեմբերի 2021թ., ժամը 15։00-ին:

Ընդհանուր ժողովի արձանագրությունը կազմվել է 08 դեկտեմբերի 2021թ., քվեարկության արդյունքներն ամփոփելուց հետո։